Kining manwal namugna pinaagi sa usa ka panday-buhat (workshop) nga gipahigayon sa nagkalain-laing pundok sa mga mag-uumang magtutudlo – nga gitawag nga Landcare Farmer Training Groups (FTGs), pinaagi sa pagpasiugda sa World Agroforestry Centre (ICRAF). Ang mga FTGs aktibong nagalihok sa nagkalain-laing lungsod sa Pilipinas, ilabi na sa Claveria, Misamis Oriental, Lantapan ug Malitbog, Bukidnon, ug San Isidro, Bohol sa Visayas. Ang mga FTG anaa usab sa mga probinsiya sa Davao del Norte, Compostela Valley, Davao Oriental, Davao del Sur, Sarangani ug South Cotabato ubos sa panagtimbayayong sa ICRAF ug Upland Development Programme (UDP), ug sa Ned, South Cotabato pinaagi sa pagdumala sa Southeast Asian Regional Center for Research in Agriculture (SEARCA). Ang mga teknolohiya nga gihisgutan sulod niining manwal kinutlo sa aktwal nga kasinatian sa mga FTGs ug mga ‘eksperto’ sa pagpalambo sa agroforestry kon ‘pangumahoy’ gikan sa ICRAF, ug nagkalain-laing ahensya sama sa Department of Environment and Natural Resources (DENR) ug Mindanao Baptist Rural Life Center (MBRLC). Tumong niining manwal nga magiyahan ang mga FTGs sa pagpahigayon sa pagbansay-bansay (training) mahitungod sa agroforestry. Ang mga nagkalain-laing topiko gibahin sa unom ka modyul: 1) nagkalain-laing sistema sa agroforestry; 2) pagkolekta ug pagtipig sa dekalidad nga semilya sa kahoy; 3) pagpaturok ug pagdumala sa mga semilya sa kahoy; 4) asekswal nga paagi sa pagpasanay sa semilyang igtatanom; 5) mga paagi sa pagkonserbar sa kayutaan ug katubigan; ug 6) mga paagi sa pagpakaylap sa maong mga teknolohiya pinaagi sa Landcare nga programa. Ang matag modyul adunay flipchart nga ginama ug makita sa buhatan sa ICRAF. Kining manwal epektibong magamit sa mga FTGs inubanan sa maong flipchart. Kining manwal naghisgut sa mga pamaagi sa pagpahigayon sa pagbansaybansay sa nagkalain-laing mga topiko mahitungod sa agroforestry. Sa laing bahin, ang mga FTGs gidasig sa pagsulay sa uban pang mga paagi nga sa ilang tan-aw haum sa mga panginahanglan sa mga sumasalmot sa pagbansaybansay (training participants)